පැරණි ගී රසාංග - පොඩ්ඩන්ට ගී තෝරමු

පහුගිය අවුරුදු දෙක දිහා හැරිලා බැලුවොත් නටපු නැටුමකුත් නෑ බෙරේ පලුවකුත් නෑ තත්වයක් තියෙන්නේ. කලින් නම් පල්ලියේ ධර්ම දුත ළමා සමාජේ පොඩ්ඩෝ ටික එකතු කරගෙන මොනවා හරි කලා කටයුත්තක් කරනවා. 2011 අවුරුද්දේ පොඩ්ඩන්ගේ සංගීත ප්‍රසංගයක් කළා. ඒ කාලේ ගෙදර ඉන්ස්ට්‍රුමන්ට් තිබුනේ කී බෝඩ් එකයි බොක්ස් ගිටාර් එකයි බොන්ගෝ එකයි චල් (ටැම්බරින්) එකයි විතරයි. සංගීතේ සුපිරියට නැගල ගියා. ඕකෙන් මේකෙන්  බැන්දට පස්සේ හොඳ වෙලා තිබුන සංගීත උණ තදවෙලා උණසන්නිපාත මට්ටමට අසාධ්‍ය උනා. කොල්ලෝ තුන්දෙනාටත් බෝ උනා. පුදුම වැඩේ කියන්නේ කොල්ලන්ගේ අම්මටත් ලාවට බෝ උනානේ(හොඳ වෙලාවට).

ඔන්න ඉතින් සේසතම දිය කර කර සංගීත භාන්ඩ මිලට ගන්න පටන් ගත්ත. ජපානෙන් කුණු ගොඩවල් ගෙනත් විකුණන කඩ පීර පීර තමා ගෙදර සාලේ සංගීත බඩු සාප්පුවක් වගේ කලේ. ( නැතුව ඉතින් අලුත් බඩු ගන්න පුලුවනියි රජේ සේවකීන්ට) හම්බකරන හැම තුට්ටුවම ඕකට යට කරනකොට ගෙදර පොඩි පොඩි මෙව්වා ගියේ නැතුවත් නෙවෙයි. කොහොම හරි 2012 මැද වෙනකොට පුල් බෑන්ඩ් එකකට ඕන ඔක්කොම බඩු රෙඩි.

2012 අවුරුද්දේ නම් හොඳ ෂෝ එකක් කළා. සුපිරි සංගීත කාරයෝ කිහිපදෙනෙක් බිහිවෙච්චි, නිතරම ගෙවල් වල බජව්ව සෙට්වෙන ගමක අපි ඉන්න නිසාද කොහෙද පොඩි උන්ට සින්දුවේ නම කියන්න විතරයි ඕන සින්දුව ගොඩ. පස්සේ අපේ ඔෆිස් එකේ සගයෙකුගේ දරුවෙකුගේ ඔපරේෂන් එකකට ලක්ෂ 35ක් ඕන වෙලා මේ ෂෝ එක සමුද්‍රා හොටලයේ කරලා පොඩි සහයෝගයකුත් (පොඩි කිව්වට පොඩිම නෑ) දුන්නා. TNL පැදුරු පාටියෙත් පොඩි උන් ටික ගැහුවා.

මෙන්න 2012 ප්‍රසංගය

දුර පෙනෙන තැනිතලා - සඳලි ලකීෂා

සඳ තනිවෙලා අහසේ -ලතිකා නෝනිස්

Thu hi meri saba - මල්ෂාන් නෝනිස්

නැළවෙන මව් උකුලේ - ඉරේෂා ලක්මාලි

ලඹ සවන් රන් පටින් - රිවිඳු ප්‍රනාන්දු

(මේ වීඩියෝ බලල හිතන්න එපා රත්තරන් හැන්ද කටේ ගහගෙන උපන්න ළමයි සෙට් එකක් මෙතන ඉන්නේ කියල. ගොඩක් ඉන්නේ ධීවර පවුල් වල දරුවෝ. හැබැයි සුපිරි දක්ෂයෝ)


ඔන්න අයෙත් සෙනසුරු දසාව ලැබුවා. අවුරුදු දෙකටම මොනවත් කලේ නැහැ. කරනවා කියල හිතනවා විතරයි කෙරෙන්නේ නෑ. එක පාරක් නම් නාට්‍ය ගී වගයක් පෙන්නුවා. එකත් හරියට උනේ නෑ.

දැන් ධර්මදුතේ පොඩි සෙට් එක කුණු කුණුව මොනවා හරි කරමු කියල .

මේ වතාවේ ග්‍රැමෆෝන් ගීත සහ පැරණි චිත්‍රපට ගීත විතරක් ෂෝ එකට කරනවා කියල තමා හිතාගෙන ඉන්නේ. මේකට සින්දු ටික තෝරාගන්න ඕන කියපු වෙලේ කෙන්ජි තමා යෝජනා කලේ පොස්ට් එකකින්ම කට්ටියට කියල සින්දු සෙට් එක හදන්න කියල

ඕක අපේ සින්දු ඇනොට කිව්වා විතරයි මු දුන්න නේද පතරංග ජාතකයක් වගේ බ්ලොග් දෙකක්. දැන් අතරමං වෙලා ඉන්නේ

දැනට තෝරාගෙන ඉන්නේ මේ ටික

රම්‍ය මනහර දළදා මැදුර - ඩෙස්මන් කෙලී
සන්ද්‍යාවේ ශ්‍රීය රම්‍යා රස - රුක්මනී දේවී/ ස්ටැන්ලි මල්ලවාරච්චි
රණ මොනරුන් රඟ දෙනු දුටුවා - මනෙලා ජෝසෆ්
ගලනා සීත ජලේ - ලතා වල පොල
පනාමුරේ ඇත් රාජා
Let me see - මනෙලා ජෝසෆ්
වෙසක් කැකුළු අතු අගපිපි - ඉන්ද්‍රාණි විජේබණ්ඩාර

ඔක්කොම එකතුවෙලා පොඩි සපෝට් එකක් දෙන්න ගැලපෙන සින්දු ටිකක් තොරන්න

ගණිත විනෝදය 01 - චෙස් දාම් ක්‍රීඩාව සොයාගත් ශේෂ පඬිවරයා ඉල්ලු ත්‍යාගය

චෙස් දාම් ක්‍රීඩාව සොයාගත්තේ සිය යටත් වැසියකු වන ශේෂ පඬිවරයාබව දැනගත් ඉන්දියානු මහරාජා වූ ශ්‍රී රාම් ඉතා සතුටට පත්ව පඬිවරයා කැඳවාඔහුට කැමති ත්‍යාගයක් ඉල්ලන ලෙස කීවේය. මහරාජාගේ ත්‍යාගවන්ත බවට තුති පිදු ශේෂ පඬිවරයා ත්‍යාගය ලෙස අවශ්‍ය දෙය කල්පනා කර පසුදින කියනබව පවසා නික්මගොස් පසුදින උදෑසන පැමිණ සිය ඉල්ලීම ඉදිරිපත් කලේය.

පඬිවරයාගේ නිහතමානී ඉල්ලීමෙන් රජතුමා පුදුමයට පත් විය..

"මහරජ තුමනි දාම් ලෑල්ලේ පළමු කොටුව සඳහා එක තිරිඟු ඇටයක්ද දෙවැන්න සඳහා ඇට දෙකක්ද, තුන්වැන්න සඳහා ඇට හතරක්ද හතරවැන්න සඳහා ඇට අටක්ද වශයෙන් පළමු කොටුවමෙන් දෙගුණයක තිරිඟු ඇටප්‍රමාණයක් ඊළඟ කොටුව සඳහා වශයෙන් කොටු හැටහතර සඳහා තිරිඟු ඇට ලබාදෙන්න"ශේෂ පඬිවරයාගේ ඉල්ලීම විය.

කෝපයට පත් රජතුමා සුළු තෑග්ගක් ඉල්ලීමෙන් සිය ත්‍යාගීවන්ත භාවය භාවය නොසලකා හැරිය බවට දෝෂ දර්ශනය කොට ධාන්‍ය මල්ල රාජ පුරුෂයන් ගෙනවිත් දෙනු ඇතැයි පැවසීය. සිනහවකින් මුව සරසාගත් පඬිතුමා මාලිගයෙන් පිටව ගියේය.

දහවල් භෝජනය අවස්ථාවේ රජතුමාට පඬිවරයා නැවත මතක් වී, ශේෂ ගේ දුප්පත් තෑග්ග දුන්නේ දැයි දැනගැනීමට දුතයකු ධාන්‍යාගාරය ට පිටත් කර හැරියේය.

රජතුමනි ඔබගේ නියෝගය අනුව ධාන්‍ය ඇට ගණන් කරනවා යනුවෙන් දුතයා කීවේය. ප්‍රමාදය ගැන රජ කෝපයට පත්විය.

රාත්‍රී නින්දට පෙර ශේෂ ගේ ධාන්‍ය මල්ල ඔහුට ලැබුනිදැයි රජතුමා විමසීය.

රජතුමනි රාජකීය ගණිතඥයන් ධානය ප්‍රමාණය ගණන් බලනවායයි පිළිතුර විය.රජතුමා කෝපයෙන් කෑගසා පසුදින එලිවනවිට අන්තිම ඇටය දක්වා ශේෂගේ සුළු තෑග්ග ලබා දිය යුතු බව නියෝග කළේය.

පසුදින උදෑසනම රාජකීය ගණිතඥයා රජු බැහැදැක්කේය.

පළමුව ඔබේ කටයුත්ත හමාරකොට ශේෂ ගේ සුළු තෑග්ග ලබාදුන්නේදැයි රජු ඇසීය.

අප ගණන් බැලුවා. ඔහු ඉල්ලු ප්‍රමාණය අති විශාලයි.

මාගේ ධාන්‍යාගාර අති විශාලයි. පොරොන්දු වූ තෑග්ග දිය යුතුයි.

එම ප්‍රමාණය දීමට ඔබතුමාට ශක්තියක් නැත
ඔබගේ සියලුම ධාන්‍යාගාර වලවත් , රාජධානියේ, සියලුම ධාන්‍යාගාර වලවත් ලෝකයේ සියලුම ධාන්‍යාගාර වලවත් එපමණ ධාන්‍ය නැත. එය දීමට අවශ්‍ය නම් ලෝකයේ සියළුම බිම් කුඹුරු කොට සාගර ජලාශ ගොඩ කොට අයිස් කඳු දිය කොට සියලු තැන්හි ධාන්‍ය වපුරන්න අණ කරන්න එවිට ශේෂ ගේ ත්‍යාගය ඔහුට දිය හැකි වනු ඇත.

ඒ පුදුමාකාර සංඛ්‍යාව කුමක්ද?

18,446,744,073,709,551,615

....................................................................................
මෙම සංඛ්‍යාව කෙතරම් විශාලදැයි සිතා ගැනීමට එම ධාන්‍ය ප්‍රමාණය ගබඩා කිරීමට අවශ්‍ය ධාන්‍යාගාරයේ විශාලත්වය සොයා බලමු.

එක් ඝන මීටරයක් පිරවීමට දල වශයෙන් තිරිගු ඇට ලක්ෂ 150ක් අවශ්‍යය.

ඒ අනුව සේෂ ගේ තෑග්ග රැස් කිරීමට ඝන මීටර 12,000,000,000,000 ක ගබඩාවක් අවශ්‍යය.

එනම් උස මීටර් 4ක් සහ පළල මීටර් 10ක ගබඩාවක් තැනුව හොත් එහි දිග කිලෝමීටර 300,000,000 කි එනම් පෘථිවියේ සිට සුර්යයාට ඇති දුර මෙන් දෙගුණයකට ආසන්න දිගකි.

........................................................................................
රාජකීය ගණිතඥයා මෙම ගණන සෑදුවේ කෙසේද?

මේ සඳහා එකෙන් පටන් ගෙන
1
1x2 =2
1x2x2=4
1x2x2x2=8
1x2x2x2x2=16
1x2x2x2x2x2=32
1x2x2x2x2x2x2=64
1x2x2x2x2x2x2x2=128
1x2x2x2x2x2x2x2x2 = 256
ආදී වශයෙන් හැට හතර වතාවක් කලින් අගය නැවත දෙකෙන් වැඩිකොට එන සියලු සංඛ්‍යා වල එකතුව ගණනය කල යුතුය.

සරල ලෙස පෙනෙන ගණිත ගැටළු තුල කෙතරම් විශාල සංඛ්‍යා තිබේද?
අනෙකකු රැවටීමට මේ ගණිත සුත්‍ර කෙතරම් සුක්ෂමව යොදාගත හැකිද?

...........................................................................................
මුළු අගය පහසුවෙන් ගණනය කල හැකි ක්‍රමයක් පසුවට.



වයි පෙරෙල්මාන් ගේ ගණිත විනෝදය (මොස්කව් ප්‍රගති ප්‍රකාශක මන්දිරය)  ඇසුරිනි

සිංහල සුළුතරය, මුස්ලිම් බහුතරය සහ ගණිත විනෝදය

 චානුක වත්තේගම විසින් රචිත "සිංහලයා සුළුතරයක් විය හැකිය කීම කැත බොරුවකි" යනුවෙන් ශීර්ෂ ගත ලිපිය මාතලන් විසින් සිය බ්ලොගයේ පළකර තිබුණි. මෙය පිළිබඳව ගුණ දොස් විවේචනයට මා ජනගහන සංඛ්‍යාලේඛනය පිළිබඳව විශේෂඥයකු නොවෙමි. නමුත් එම ලිපියේ අන්තර්ගතය පිලිබඳ ගණිතමය දැක්මෙන් සැක සංකා ඇති කරවන කරුණු කිහිපයක් තිබේ. එලෙසින්ම අදාළ ලිපියට පිළිතුරු ලියන මහා කළු සිංහලයාගේ ලිපිය සම්බන්ධවද දැඩි විවේචනයක් තිබේ .

පළමුව චානුක වත්තේගමගේ ලිපිය සලකා බලමු.
1. මෙම ලිපිය පුරාවටම ජනවාර්ගිකමය ජනානුපාතිකය ප්‍රතිශතයක් ලෙස මිස, සංඛ්‍යාත්මකව දක්වා නොමැත. නමුදු සංඛ්‍යාත්මක සත්‍ය වෙනස දක්වා ඇත(වගුව 1). එය ප්‍රතිශත ගණනය පිලිබඳ සැක සංකා මතු කරයි.
2. වගුව -2 හි පාඨකයාගේ පහසුවට බව පවසමින් ජනවාර්ගිකමය වාර්ෂික වර්ධන ප්‍රතිශතය එක දශම ස්ථානයකට වට කොට පෙන්වා ඇත. සුවිසල් සංඛ්‍යා ගණනයහිදී අවම වශයෙන් දශම ස්ථාන තුනකට අගයන් නොගත හොත් විශාල අපගමනයක් මතු වේ.
අපගමනය සිදු වන ආකාරය පහත වගුව පෙන්වයි

මේ අනුව එක දශම ස්ථානයකට ලඝු කල විට 0.649 අගය .6 ලෙසින්ද .651 අගය .7 ලෙසින්ද වෙනස් වෙයි එනම් .002 ක විචලනය ගණනයේදී 1000ක අපගමනයකට හේතු කරවයි (මෙය සිදුවිය හැකි උපරිම අපගමනයයි
3. සංඛ්‍යාලේඛන ඇසුරින් ලබාගත් අගයන්ගේ අනාගත විචලනය ගණිතමය වශයෙන් නිර්ණය කොට නැත.

මේ හේතුන් නිසා චානුක වත්තෙගමගේ ලිපිය විද්‍යාත්මක පැහැදිලි කිරීමක් වශයෙන් භාරගත නොහැක.

මෙවන් අඩුපාඩු රැසක් සහිත ලිපිය පදනම් කොටගෙන මහා කළු සිංහලයා සරල ගණිත විජ්ජාවක් පෙන්වමින් චානුක වත්තෙගමගේ ලිපියට අභියෝග කරයි.

මෙහිදී මහා කළු සිංහලයා 1991 සහ 2011 යන වර්ෂවල සංඝණන දත්ත ඇසුරෙන් ලබාගත් එක් එක් ජන වර්ගවල වර්ධන වේගය දිගටම පවතීයි උපකල්පනය කරමින් ඉදිරි සංඝණන පවත්වන වර්ෂ සඳහා නිර්මානය කරන ලද ජනසංඛ්‍යා පහත ප්‍රස්ථාරය උපයෝගී කොටගෙන විදහා දක්වයි.

මෙහිදී මහා කළු සිංහලයා විසින් ප්‍රස්තාරය සඳහා පාදක කරගත් පහත කරුණු පෙන්වා දී නොමැත.
1. 2011 සත්‍ය වාර්ගික ජන සංයුතිය
2. 2011 සත්‍ය වාර්ගික ජන සංයුතිය සඳහා වන වාර්ෂික වර්ධන වේගයන්
3. ප්‍රස්තාරය සඳහා දත්ත ප්‍රක්ෂේපනයට යොදාගත් ක්‍රමවේදය හෝ ගණිත සුත්‍රය

මහා කළු සිංහලයාගේ ලිපියෙහි මෙවන් කිසිදු වැදගත් දත්තයන් ගෙන තොරව ප්‍රස්තාරය පමණක් ඉදිරිපත් කොට වසර 2261 වනවිට සිංහල සහ මුස්ලිම් ජන සංඛ්‍යා සමාන වන බව ප්‍රකාශ කරයි.

මෙම ප්‍රස්තාරය නිර්මාණය කල ආකාරය ඔහුගේ ලිපියේ දැක්වෙනුයේ මෙසේය.
//නමුත් එසේ නොවේ ඒ බව පෙන්වීමට මම 1991 සහ 2011 යන වර්ෂවල සංඝණන දත්ත ඇසුරෙන් ලබාගත් එක් එක් ජන වර්ගවල වර්ධන වේගය දිගටම පවතීයි උපකල්පනය කරමින් ඉදිරි සංඝණන පවත්වන වර්ෂ සඳහා නිමානය කරන ලද ජනසංඛ්‍ය පහත ප්‍රස්ථාරයේ පෙන්වයි. මෙහි 2011 සඳහා සත්‍ය අගයන්ද ඉන්පසු ගණනය කල අගයන්ද වේ.//

මහා කළු සිංහලයා සඳහන් කරනා ක්‍රමවේදය භාවිතා කර චානුක වත්තෙගමගේ දත්ත සහ විකිපීඩියාවෙන් ලබාගත් දත්ත භාවිතා කර මා විසින් ජනගහන වර්ධනය පිලිබඳ කරනු ලබන ප්‍රක්ෂේපනය පහතින් දැක්වෙයි.

චානුක වත්තේගමට අනුව 2001 වසර සදහා වාර්ෂික වර්ධන වේගය පහත දැක්වේ.

විකි පීඩියාවට අනුව 2011 වසරේ වාර්ගික වශයෙන් ජන සංයුතිය පහතින් දැක්වේ

චානුක වත්තේගමගේ ගණනයන්හි ශ්‍රී ලාංකික මැලේ, බර්ගර් සහ යුරේසියානු වෙනම පෙන්වා නැත එබැවින් එම ජනගහණයන් වෙනත් කොලමට ගෙනගොස් පහත වගුව සකසා ඇත
තවද සමස්ථ ජනගහන වර්ධන වේගය කිසිදු ලිපියක දක්වා නොමැත. එබැවින් එම අගයද විකිපීඩියාවෙන් ලබාගෙන ඇත

ඉහත දත්ත ඇසුරින් මහා කළු සිංහලයා ගණනය කල ආකාරයට වත්මන් ජන වර්ධන වේගය දිගටම පවතින්නේ යයි උපකල්පනය කොට අනාගත ජනගහන වර්ධනය පහත වගුවේ ආකාරයට ප්‍රක්ෂේපනය කල හැක

මෙම වර්ධනය වසර 2681 වනතෙක් පැවතියහොත් එවකට ජනගහන දත්තය

 
ඉහත ගණනයට අනුව වසර 2311 වනවිට ශ්‍රී ලංකාවේ මුස්ලිම් ජනගහනය සිංහල ජනගහනය ඉක්මවා යනු ඇත.

නමුත් මෙම ගණනයන්හි අතාත්වික බව පහත කරුණු වලින් දක්විය හැක.
1. ගණනයට අනුව වසර 2311 වනවිට සමස්ත ජනගහනය මිලියන 414ක් දක්වා ඉහල යනු ඇත මෙය වසර 300ක් තුල විසිගුනයක වැඩිවීමකි
2. ජන අනුපාතයෙහි වර්ධන වේගය වෙන වෙනම ගෙන ගණනය කල විට සමස්ථ ජනගහනය මිලියන 414ක් වුවද සමස්ත ජනගහනයේ වර්ධන වේගය වන 0.913 අනුව ගණනය කල විට සමස්ත ජනගහනය මිලියන 278 කි. එනම් මිලියන 136ක වෙනසකි
3. ප්‍රධාන ජන වර්ග වලට අමතරව දැනට 106,836 ක් වන වෙනත් ජනවර්ග 2311 වන විට 399ක් දක්වා ක්ෂය වනු ඇත. එනම් අතු ගෑවී යනු ඇත.
4. මෙම වර්ධන වේගය දිගටම පැවතියහොත් වසර 2681 වනවිට සමස්ත ජනගහනය බිලියන 74 ක් බවට පත්වනු ඇත මෙය 2014 වසරේ සමස්ත ලෝක ජනගහනය වන බිලියන් 7.243 මෙන් දස ගුනයකටද වඩා වැඩි අගයකි. එනම් ශ්‍රී ලංකාවේ වපසරිය වන වර්ග මීටර 65,610,000,000 ( = වර්ග කිලෝමීටර 65,610) තුල සැම වර්ග මීටරයකම එක් පුද්ගලයකු සිටිනු ඇත

මෙවන් ගණිත විජ්ජා බොහොමයක් වයි පෙරයිල්මාන්ගේ ගණිත විනොදය පොතේ ඇත.

"තඹර සර" සංගීත සන්ධ්‍යාව සාර්ථකයි.

කළුතර සිරිකුරුස විද්‍යාලය ප්‍රථම වරට සංවිධානය කළ "තඹර සර" සංගීත සන්ධ්‍යාව සැප්තැම්බර් මස පස්වන ඉරු දින විද්‍යාලීය ශාලාවේදී පැවැත්වින. මෙම අවස්ථාවට ප්‍රධාන ආරාධිතාව වශයෙන් ප්‍රවීණ සිනමාවේදිනී සුමිත්‍රා පීරිස් මහත්මිය සහභාගී වුවාය.

කළුතර සිරිකුරුස විද්‍යාලයේ 6 වසරේ සිට 10 වසර දක්වා සිසුන්ගෙන් සැදුම් ලත් පෙරදිග වාදන වෘන්දය ගී සැඳෑව සඳහා සංගීතයෙන් දායකත්වය දැක්වීය. ප්‍රවීණ වයලීන වාදක නිශාන්ත ගුරුදෙනිය මහතාගේ මෙහෙයවීම යටතේ පුහුණුව ලද මෙම වාදන වෘන්දය ගුණාත්මක ප්‍රාසාංගික අත්දැකීමක් තිලින කළේය.

 ප්‍රවීන කලා කරුවන් වන සුනිල් එදිරිසිංහ, එඩ්වඩ් ජයකොඩි, චරිතා ප්‍රියදර්ශනී පීරිස් සහ රෝහණ බෝගොඩ වේදිකාව සංගීතවත් කලහ. ඔවුන්ගේ ගායනයන්ගෙන් පසුව වාදනය සම්බන්ධව මේ ප්‍රවීණ කලා කරුවන් සියලු දෙනාගේම ප්‍රසංසාව වාදන වෘන්දයහි දරුවනට හිමිවිය. සියලු කලාකරුවන් තමනට කිසිදු අපහසුතාවකින් හෝ බාධාවකින් තොරව ගායනයේ යෙදෙන්නට හැකි මට්ටමට දරුවන් සැපයු සංගීතය ගුනාත්මක බවින් යුතු බව පැවසූහ.

කළුතර සිරිකුරුස විද්‍යාලයේ විදුහල්පති ආචාර්ය ගරු කැමිලස් ප්‍රනාන්දු පියතුමාගේ සංකල්පයකට අනුව මෙම ප්‍රසංගය වේදිකා ගත කෙරින. පාසැල් සිසුන්ගේ සංගීත දැනුම වර්ධනය කර ජාතික තලය දක්වා ඔවුන් ඔසවා තැබීම මෙම මෙහෙවරේ අරමුණ බව එතුමා පැවසීය.

සංගීත ප්‍රසංගයට අමතරව විද්‍යාලීය සිසුන්ගේ විසින් ලියා ප්‍රකාශයට පත්කල පොත් කිහිපයක් සුමිත්‍රා පීරිස් මහත්මියගේ සුරතට පිළිගන්වා එළිදැක්වීමද එදින සිදුවිය.

සංගීත චාරිකාවක් 24 - Pussycat සහෝදරියන් තිදෙනෙකු ගෙන් සමන්විත වූ සංගීත කණ්ඩායම

එක පවුලේ සහෝදරියන් තිදෙනෙකුගේ ගායන කුසලතාව තුලින් ලෝක ප්‍රසිද්ධ වූ Pussycat ගායනා කණ්ඩායමේ කතාව අද සංගීත චාරිකාව වෙත ගෙන එනවා. මේ පොස්ටුව ලියන්න හිතුනේ ජාලය පුරා සැරිසරන කොට අහම්බෙන් ඇස ගැටුණු My Broken Souvenirs ගීතය වසර 25ක් විතර ඈතට සිත ගෙනගිය නිසා. කලෙක මෙම ගායිකාවන් තිදෙනා ගුවන්විදුලි ඉංග්‍රීසි සේවය බදු අරන් තිබුනා කීවොත් නිවැරදියි. 

පුසිකැට් නෙදර්ලන්තයේ බිහිවුන කන්ට්‍රි සහ පොප් ශෛලීන්හි නිර්මාණ බිහි කල සංගීත කණ්ඩායමක්. මෙම කණ්ඩායම : Toni, Betty සහ Marianne නම් සහෝදරියන් මුලික කොටගෙන Lou Willé , Theo Wetzels, Theo Coumans සහ John Theunissen යන සාමාජිකයින්ගෙන් සමන්විත වුවා.

සංගීත කණ්ඩායම පිහිටුවාගැනීමට පෙර මෙම සහෝදරියන් තිදෙනා නෙදර්ලන්තයේ ලිම්බර්ග් නගරයේ දුරකථන ක්‍රියාකාරිනියන් ලෙසින් සේවය කළා. මෙම කාලයේදී Theunissen, Wetzles සහ Coumans තිදෙනා ස්කම් නම්වූ සංගීත කණ්ඩායමේ වාදකයන් වශයෙන් කටයුතු කළා. Ricky Rendall නම් වූ සංගීත කණ්ඩායමේ වාදකයකු වූ Lou Wille සහ ටොනිගේ විවාහයෙන් පසුව සියලු දෙනා එක්වී Sweet Reaction නමින් සංගීත කණ්ඩායමක් පිහිටුවා ගත් අතර එම කණ්ඩායමේ නම පුසිකැට් ලෙසින් පසුව වෙනස් කරනු ලැබුවා.

1975 වසරේ මෙම කණ්ඩායම එළිදැක්වූ මිසිසිපි ගීතය සමස්ත යුරෝපය පුරා ප්‍රචලිත වූවා. නමුත් මෙම ගීතය බ්‍රිතාන්‍ය ගීත දර්ශක වලට ඇතුලත් වුයේ 1976 ඔක්තෝම්බරයේ UK Singles Chart හි පලමු තැනට පැමිණීමෙන් පසුවයි. Werner Theunissen නම් වූ සහෝදරියන් තිදෙනාගේ ගිටාර් ගුරුවරයා ගීතයේ පද රචකයා වනවා. මිසිසිපි ගීතය ලොව පුරා පිටපත් මිලියන පහකට වඩා අලෙවියක් වාර්තා කොට තිබෙනවා.

අනතුරුව 1976 වසරේ ගායනා කල Smile සහ 1978 වසරේ ගායනා කල Hey Joe ගීත දෙකද සුවිසල් අලෙවි වාර්තා වලට හිමිකම් කීවා.

Smile

Hey Joe

පුරා දශකයක කාලයක් ගීත ඇල්බම් 17ක් එළිදැක්වූ මෙම කණ්ඩායම ලොව පුරාම ප්‍රසංග පවත්වමින් චාරිකාවන් හි යෙදුනා. 70 සහ 80 දශකයේ බටහිර ජර්මානු Musikladen රුපවාහිනී මාලාවේ පුසිකැට් කණ්ඩායමහි ගීත ප්‍රචාරය වුවා. කණ්ඩායමේ අනෙකුත් විශ්ෂ්ඨ නිර්මාන වන Georgie, Wet Day in September සහ My Broken Souvenirs ගීත ලොව පුරා ගීත දර්ශක වල ස්ථාන ගතව තිබෙනවා.

Georgie

Wet Day in September

චාරිකාව තව දුරයි.

විසිපස් වන කොටසින් හමුවමු

සංගීත චාරිකාවක් 23- Alston Koch ආසියාවේ පොප් රජු ලෙස කිරුළු පැලඳු ශ්‍රී ලාංකිකයා - දෙවන කොටස

ඇල්ස්ටන් කෝක් ගේ විශිෂ්ඨ සංගීත නිර්මාණ පිළිබඳව මෙම ලිපියේ පළමු කොටසින් කියවුනා. සංගීත ක්‍ෂේත්‍රයේ ඔහුගේ ජයග්‍රහණයන් පිළිබඳව ලිපියේ දෙවන කොටසින් ලියැවෙනවා

පළමු කොටස මෙතැනින්

1986 වසරේ දී ලොව වඩාත්ම වියදම්කාරී ක්‍රීඩා ඉසව්ව ලෙසින් හැදින්වෙන The America's Cup යොට් තරඟාවලිය සඳහා මියුසික් වීඩියෝවක් නිර්මාණය කරන ලෙස ඇල්ස්ටන් කෝක් හට ඕස්ට්‍රේලියාවෙන් කැඳවීමක් ලැබෙනවා. තරඟාවලියේදී ඕස්ට්‍රේලියානු කොකඹුරා (Kookaburra) යාත්‍රාව ඇමෙරිකානු Stars & Stripes යාත්‍රාව සමග තරංග වැදීමට තේරී පත් වීමෙන් ඔහුගේ මියුසික් වීඩියෝව CNN සහ MTV නාලිකා වල තරඟාවලිය පුරාම ප්‍රචාරය වීමෙන් ඇල්ස්ටන් මහත් ප්‍රසිද්ධියක් ලබනවා.

ගීපද රචකයකු ලෙස සම්භාවනාවට පාත්‍ර වෙමින් Melissa Tkautz නම් ගායිකාව සඳහා පදරචනය කල Read My Lips ගීතය සඳහා ARIA සම්මානය 1990 වසරේදී ඇල්ස්ටන් ලබාගැනීමට සමත්වනවා. 90 දශකයේදීම ඇල්ස්ටන් ගායනා කල Never Felt This Way Before ගීත සංගීත දර්ශක වල හත් වන ස්ථානය වෙත ගමන් කරනවා.
Read My Lips

Never Felt This Way Before

සංගීත ලෝකය ජයගන්නා ඇල්ස්ටන් අනතුරුව සිනමාවට එක්වනවා. මැතිව් පීරිස් පුජකයාගේ චරිතය ඇසුරින් ගොඩනැගුනු සත්‍ය කතාවක් වන According to Matthew නම් හොලිවුඩ් සිනමා පටයේ ජැකලින් ෆර්ඩිනැන්ඩිස් සමග ප්‍රධාන චරිතය වන මැතිව් පීරිස් ලෙසින් රගපෑමට ඇල්ස්ටන් දායක වනවා. 

තවද A Common Man නම් සිනමා නිර්මාණයටද ඔහු දායකත්වය දක්වනවා. ඇල්ස්ටන්ගේ පුත් ජේම්ස් කොක් ද ශ්‍රීමත් බෙන් කිංස්ලි සමග මෙහි පෙනී සිටිනවා

A Common Man සම්පුර්ණ සිනමා පටය මෙතැනින්

2014 වසරේදී American Academy Of Music නැතහොත් The Grammy Foundation හි කමිටු සාමාජිකයකු ලෙස පත්වන ඔහු ශ්‍රී ලංකාවට ගෙන දෙනුයේ ඉමහත් ආඩම්බරයක්.

අන්තර්ජාතික ප්‍රසංග කලාව තුල ඇල්ස්ටන් කෝක් ලබාගත් ජයග්‍රහණ ලැයිස්තුව ඉතා දීර්ඝයි. මෙම නිහතමානී කලාකරුවාට උපහාරයක් ලෙස එම ලැයිස්තුවෙන් සුළු කොටසක් පහතින් දක්වනවා

• Gold තත්වයේ අලෙවියක් සහිත ගීයක් ගායනා කල එකම ශ්‍රී ලාංකිකයා බවට පත් වීම (Disco Lady 1977 RCA Records) 
• Green Earth Foundation හි Climate Change තානාපතිවරයා බවට පත්වීම සහ එක්සත් ජාතීන්ගේ ලෝක සංචාරක සංවිධානය මගින් සම්භාවනාවට පත් කල ප්‍රථම ගී පද රචකයා බවට පත්වීම.
• 1976 වසරේදී 'The Best of ABBA' නම් රුපවාහිනී වැඩසටහනේ පෙනීසිටි ප්‍රථම ජාත්‍යන්තර ගායකයා බවට පත් වීම
• වසර 2010 දී Hard Rock Cafe හි 'Hall Of Fame' ලෙසින් ඇතුලත්වීම
• අඟල් 12 වයිනයිල් තැටියක තමාගේම ගීයක් තැටිගතකළ දකුණු අර්ධගෝලයේ ප්‍රථම ගායකයා බවට පත්වීම වීම (Disco Lady 1977 RCA Records)
• ඕස්ට්‍රේලියාවේ ADDA සංගීත සම්මාන උළෙලේ හොඳම එකල ගායනයට සම්මාන ලැබූ ප්‍රථම ආසියානුතිකයා වීම
• Sunday Mirror සම්මාන උළෙලේ ' Best New Talent' සම්මාන ලාභී ප්‍රථම විදේශිකයා වීම
• AC\DC, ජෝන් පෝල් යං සහ එයා සප්ලයි සමග ප්‍රසංග පැවැත්වූ ප්‍රථම ආසියානු සංගීත කණ්ඩායම බවට DARK TAN පත්වීම
• 'The America's Cup' සඳහා ගීත රචනය සහ ගායනය කල ප්‍රථම ආසියානුතිකයා බවට පත්වීම.
• ශ්‍රී ලංකා සංචරණය සඳහා ප්‍රථම සන්නාම තානාපති වරයා බවට පත්වීම
• කේබල් රූපවාහිනී ශ්‍රී ලංකා වට හඳුන්වාදීම
• හොලිවුඩ් සිනමාවට ප්‍රධාන චරිතයක් රඟපෑ ප්‍රථම ආසියානු ගායකයා බවට පත්වීම
• Australian Record Industry Association වෙතින් FUNKMASTER ලෙසින් නම්වීම 

Alston in Retro (Part 1)

චාරිකාව තව දුරයි
24 වන කොටසින් හමුවමු

සංගීත චාරිකාවක් 22 - Alston Koch ආසියාවේ පොප් රජු ලෙස කිරුළු පැලඳු ශ්‍රී ලාංකිකයා - පළමු කොටස

දම්පාට දේදුන්නේ සංගීත චාරිකාව තුල මෙතෙක් ලියවුනේ බටහිර රටවල සංගීත කණ්ඩායම් සහ ගායකයන් ගැන පමණයි. මේ වනවිට බටහිර සංගීත ශෛලීන් කිහිපයක් ගැන විස්තර ලියා අවසන් නිසා මට හිතුන ශ්‍රී ලංකාවෙන් බිහිව බටහිර සංගීතය ජයගත් කිහිප දෙනෙකු ගැන විස්තර ලියන්න කාලය හරි කියල. කවුරු ගැන ලියනවද කියල හිතනකොට බිල් ෆෝබ්ස් සහ ඇල්ස්ටන් කෝක් යන දෙදෙනා මතක් උනා. දෙදෙනාම ඔස්ට්‍රේලියාවට සංක්‍රමණය වී එහිදී බොහෝ බටහිර ගීත ගායනා කොට ජාත්‍යන්තර තලය ජයගත් ගායකයන්. දෙදෙනා අතරින් මගේ මිත්‍රයකු වන ඇල්ස්ටන් කෝක් ගැන මුලින් ලියන එක හොඳය කියා හිතුනා. ඇල්ස්ටන් කෝක් ම මුලින්ම හඳුනා ගත්තේ ශ්‍රී ලංකා සංචාරක සන්නාම තානාපතිවරයා වශයෙන් පත්වූ අවස්ථාවේ. ඔහු විසින් ගායනා කල Climate Change ගීතය අපගේ සිත් පැහැර ගත්තා.

1951 වසරේ ජුලි 21 දින කොළඹදී උපත ලබන ඇල්ස්ටන් කෝක් සිය මුලික අධ්‍යාපනය ලබනුයේ වෙස්ලි විද්‍යාලයෙන්. තරුණ වියට පැමිණෙන ඇල්ස්ටන් ශ්‍රී ලංකාවේ එවකට තිබු බටහිර සංගීත කණ්ඩායම් කිහිපයක් සමග ගායනයේ යෙදෙනවා. මෙම කණ්ඩායම් අතරින් ජෙට් ලයිනර්ස් කණ්ඩායම ප්‍රමුඛ වනවා.

ශ්‍රී ලංකාවේදී බටහිර ප්‍රසිද්ධ ගායකයන්ගේ ගීත ගායනයේ යෙදෙන තරුණ ඇල්ස්ටන් 1970 වසරේදී ඕස්ට්‍රේලියාවේ සිඩ්නි නගරයට සංක්‍රමණය වනවා. වෙනත් සංක්‍රමණිකයින් සිය ජීවිකාව සඳහා කුමක් හෝ රැකියාවක් සොයන අවස්ථාවේ ඇල්ස්ටන් අධ්‍යනය කරනුයේ සංගීතය තුලින් දිගු ගමනකට ඔස්ට්‍රේලියාව තුල ඇති අවස්තාවන් පිලිබඳවය. මෙහිදී ඔහුට විකල්ප දෙකක් හමුවනවා. ඉන් පලමුවැන්න අතිශය පහසු නමුත් ගමනාන්තයක් නොමැති (Road to nowhere) අනුන්ගේ ගීත ගායනය කරමින් එරට සිටින ශ්‍රී ලාංකිකයින් පිනවීම. අනෙක ස්වතන්ත්‍ර නිර්මානය තුලින් ජාත්‍යන්තර තලයට පිවිසීම. මෙහිදී ඇල්ස්ටන් වඩාත දුෂ්කරවූ දෙවැනි විකල්පය තෝරාගනිමින් ඩාර්ක් ටෑන් (Dark Tan) සංගීත කණ්ඩායම පිහිටුවා ගන්නවා.

1977 වසරේ ඔහු විසින්ම පද රචනය කර ගායනා කල Disco Lady ගීතය අති විශිෂ්ඨ අලෙවියක් වාර්තා කරමින් "Gold Record" තත්වයට පත් වනවා. මෙම ගීතය සඳහා International Disc Jockey Association වෙතින් 'best new talent' සම්මානය ලැබෙනවා. තවද ඕස්ට්‍රේලියාවේ ඔබ්සවර් පුවත් පත වෙතින් Best Disco Band සම්මානය Dark Tan කණ්ඩායම දිනා ගන්නවා. ඉතිහාසය පුරා ශ්‍රී ලාංකිකයකු විසින් ගෝල්ඩ් තත්වය ලබාගත් එකම සංගීත නිර්මානය මෙය පමණක් වනවා. මෙම ගීතය අකණ්ඩව සති 18ක් ගීත දර්ශකවල ස්ථානගතව තිබු අතර ආසියානු ගීත දර්ශක වල අංක එක වශයෙන් සති හයක කාලයක් ස්ථානගතව පැවතිය 

The Best of ABBA, Bandstand. Countdown වැනි රුපවාහිනී වැඩසටහන් වලට සහභාගී වීම නිසා Dark Tan කණ්ඩායම ඕස්ට්‍රේලියාවේ අතිශය ජනප්‍රිය වනවා.

අද වනවිට ඇල්ස්ටන් කෝක් නම් වන මේ අසාහය ශ්‍රී ලාංකික ගායකයා American Academy Of Music නැතහොත් ග්‍රැමී පදනමේ කමිටු සාමාජිකයකු වශයෙන් කටයුතු කරනවා. මෙය ලෝක සංගීතය තුල ශ්‍රී ලාංකිකයකු ගමන් කල  ඉහලම  ස්ථානයයි.

ලෝක සංගීත පීඨිකාව වෙත ඔහු ගිය ගමන දෙවන කොටසින් ලියන්න බලාපොරොත්තු වෙනනවා



ඇල්ස්ටන් කෝක් ගේ  ගී කිහිපයක්
Gimme that Banana

Pappa Was a Rolling Stone

 Dancing in the City

War and Peace

පළමු කොටස අවසානයි
දෙවන කොටස සංගීත චාරිකාවක් - 23 තුලින්

ලංකාවේ කාන්තා සංගීත කණ්ඩායම් බිහිනොවන්නේ ඇයි

සංගීත චාරිකාවක් 21 කොටස ලියවුනේ Clout නම් වූ කාන්තා සංගීත කණ්ඩායම පිළිබඳවයි. මේ කණ්ඩායම සබ්ස්ටිටියුට් නම් ගීතයෙන් ජනප්‍රියතාවට පැමිණ විශිෂ්ඨ මට්ටමේ ගීත රැසක් ගායනා කල මුළුමනින් කාන්තාවන්ගෙන් සමන්විත වූ රොක් සංගීත කණ්ඩායමක්.

මෙම පොස්ට්ටුව සඳහා ප්‍රතිචාර දක්වන තිස්ස දොඩන්ගොඩ මිත්‍රයා කොමෙන්ටුවක් තුලින් සංවාදයක් මතුකරනවා ලංකාවේ කාන්තා සංගීත කණ්ඩායම් බිහිනොවන්නේ ඇයි ද කියන කාරනාව පිලිබඳව. සංවාදය ඉදිරියට ගෙනයන්න හොඳ මාතෘකාවක් බව දැනුනු නිසා මට හිතුනා මෙතක් කල සංවාදයේ කොමෙන්ටු මේ පොස්ට් එක තුලට ගෙනවිත් හොඳ සංවාදයක් ඉදිරියට ගෙනයන්න

තිස්ස, ඉන්දික සහ මා අතර මෙතෙක් සිදුවූ සංවාදය මෙලෙස දිගහැරෙනවා

තිස්ස දොඩන්ගොඩ Sunday, August 31, 2014 10:39:00 AM
සබ්ස්ටිටියුට් මම සෑහෙන්න ආසා එකක් මචං
ලංකාවේ "වින්ස්ලෝ සික්ස්" (වින්ස්ලෝ හැරුණම) මේ වගේ ගෲප් එකක් නේද මචෝ?
"මුතු වාගේ බබලනවා" , "රණ මොණරුන් රඟ දෙනු දුටුවා - නිල් දිය මත මහනෙල් දුටුවා" එයාලගෙ සුපිරි නිර්මාණ
ඊට පස්සෙ ලංකාවේ ලේඩි ගෲප්ස් බිහිවුණේ නැත්තේ ඇයි කියලද ජීවන හිතන්නේ - ඒ කල්ට් එක ගැහැණුන්ට නොසරිලනව කියල හිතුනද?
ත්‍රී සිස්ටර්ස් වුණත් සින්දු කීව විතරයි
තව එක ගෲප් එකක් තිබ්බ මට මතක නෑ - ඉස්සර ටී එන් එල් එකේ පර්ෆොර්ම් කලා - එයාලානම් හැබැයි හොඳ මියුසිෂන්ලා
උඹ අනිවා දන්නව ඇති
විස්තර ටිකක් කොමෙන්ට් විදිහට දැම්මනම් මරු මචෝ!

Jeevana Fernando Sunday, August 31, 2014 3:18:00 PM
මචං Winslow 6 කණ්ඩායමේ මමනං ගොඩක්ම ආස කරන්නේ වෛද්‍ය මනෙලා ජෝසෆ් ගායනා කරන Let Me See ගීතයට. https://www.youtube.com/watch?v=XJz0gRlzKBo නියම Disco ගීතයක්. ගීතය තුල ඩ්‍රම්ස් හැසිරවීම සහ සැක්සෆෝන් සොලෝ එක සුපිරි.

Winslow 6 කණ්ඩායම මොරටුවේ එකම පවුලක සාමාජිකයන්ගෙන් සමන්විත වීම නිසා ඔය තරම් හරි දුර යන්න ඇති. කෙසේ වෙතත් මේ කණ්ඩායමේ පැවැත්ම අවුරුදු හතරකට සීමාවෙනවා. දුව රෝෂි සහ රණ මොණරුන් ගී දෙක ශ්‍රී ලාකික ගීත දර්ශක තුලට පැමිණියා.

All girl Bands ලංකාවේ බිහි නොවීම සම්බන්ධ ප්‍රශ්නයට තියෙන්නේ සරල පිලිතුරෙක්
මචන් මගේ කොල්ලෝ තුන් දෙනාට බෑන්ඩ් එකක් හදල දෙනකොට මට පවුලෙන් ආපු ප්‍රෙෂර් එක දන්නවනම් ඔය ප්‍රශ්නය අහන්නේ නෑ. කොල්ලෝ තුන්දෙනාව කාල දානවා විනාශ කරනවා කියල තමයි කතාව එන්නේ.
කොල්ලන්ට එහෙමනම් කෙල්ලන්ට මොන කතාද.

ඉන්දික උපශාන්ත Sunday, August 31, 2014 7:58:00 PM
අනුරාධපුරේදි කෙල්ලොන්ගෙ බෑන්ඩ් එකක් මෑත කාලෙ බිහි උනා. ඒත් දැන් ඒකත් නෑ මම හිතන්නෙ.

මේ ලඟදි යශෝධ රේඩියෝ ප්‍රෝග්‍රෑම් එහෙකට ඇවිත් කියනව හැම්දාම ඕගොල්ලො මගෙන් ප්‍රශ්ණ අහල අහල අන්තිමේටම තාම බඳින්නෙ නැත්තෙ ඇයි කියල අහලයි ඉවර කරන්නෙ, කොටිම්ම ලංකාවෙ මොන පශ්චාත් නූතනවාදී කියන මහ ලොකු අයත් තාම මගෙන් ඔය දේ අහනව කියල. තනියම ඉන්න කෙල්ලෙක් ප්‍රශ්ණයක් වෙන, "බෑන්ඩ් එහෙක" හිටියොත් නෙමෙයි රෑට සින්දු කියන්න ගියත් "කෙල්ලෙක් - බඩුවක්" වෙන සමාජෙක කොහෙද බං ගෑණු බෑන්ඩ් හැදෙන්නෙ?

Jeevana Fernando Monday, September 01, 2014 11:04:00 AM
ඔව් ඉන්දික, තමන්ට කරන්න බැරි දෙයක් අනුන් කරනකොට එකට පහර දෙන එක තමා ගොඩක් දෙනෙක් කරන්නේ. අපේ වගේ සංස්කෘතික සීමා වැඩි සමාජ වල බොහොම පහසුවෙන් අලුත් දෙයක් කරන එකාට පහර දෙන්න ලේසියි. අලුත් සංකල්පයට නෙවෙයි කරන පුද්ගලයාට පහර දීම තුල කඩාකප්පල් කිරීම් බොහෝ පහසුයි

තිස්ස දොඩන්ගොඩ Monday, September 01, 2014 11:16:00 AM
මෙතනදි ඉන්දික එක්ක එකඟ නෑ. ගොඩක් වෙලාවට සංගීත කන්ඩායම් බිහිවෙන්නේ ලොකු ආර්ථික ශක්තියක් ඇති පිරිස් එක්ක. මොකද උපකරණ වාද භාණ්ඩ කුළියට අරන් ගෲප්ස් හදාගන්න බෑ නේ. ඉන්ද්‍රානි පෙරේරා හැරුණම, මිනෝන්, ලාංකිකා, ඩොක්ට මනෙලා ඇතුලු වින්ස්ලෝ සික්ස් පිරිස, ඩැල්රීන් මේ ඔක්කොමල ආවෙ ඔය කියන සංස්කෘතික බැමි වැලඳගත්තු පරිසර වලින් නෙමේ. නමුත් එහෙම බාධක නැති, ආර්ථික ෂක්තියකුත් තිබිච්ච පිරිසක් අතිනුත් එහෙම ඒවා භිනොවුණේ ඇයි කියන එකට වෙනම හේතු තිබිය යුතුයි. ඔය කියපු අය ගොඩක් ගීත ගැයුවේ පිරිමි අයත් එක්ක තනි තනිව. එහෙම කලානම් ඇයි එකතු වෙලා ගෲප් එකක් නොසෑදුනේ?

අනෙක් පැත්තෙන් ලෝකයේම ගර්ල් ගෲප්ස් කොච්චර තිබේද පිරිමි වලට සාපේක්ෂව?
ගැහැනු ගොඩකගේ හඬ එක වැර ඇසෙන එක කර්ණ රසායන නැද්ද ඒ හැටි ;-)
පිරිමි කටහඬවල් මැද්දෙන් කාන්තා කටහඬක් ගලා එන එකද වඩා මිහිරි?

Jeevana Fernando Monday, September 01, 2014 2:30:00 PM
මචන් දොඩන්
සංගීත කණ්ඩායම් ආර්ථික ශක්තියෙන් හෝ මුදල් බලයෙන් හදන්න පුළුවන් කියන් එකට මම එකඟ නෑ.

ඔතන තියෙන්නේ අපේ රටේ සංගීත අධ්‍යාපනය පිලිබඳ ප්‍රශ්නයක් නිසා ඇතිවූ මානව සම්පත් හිඟයක්. ආර්ථික ශක්තිය ඇති පවුල් වල ගැහැණු ළමුන් හදාරනුයේ බටහිර සම්භාව්‍ය සංගීතය. බොහෝදෙනෙක් තවමත් හදාරන්නේ Trinity College of Music එකේ පියානෝ වාදනය. ඕක හදාරලා විභාග සමත් වෙච්චි බහුතරයකට පාටි එකකට සින්දුවක් ගහ ගන්න බෑ. අනෙක අද තියන සංගීත ශෛලිනට බොහෝ දුරස්තර ශෛලියක් තුල තමයි විෂය නිර්දේශය පවතිනුයේ.

අනෙක සංගීත කණ්ඩායමකට අත්‍යාවශය ගිටාර් වාදනය නිපුන වීම සඳහා දැඩි කැපවීමක් සහ දැඩි වෙහෙසකර පුහුණුවක් අවශ්‍යයි. (මේ කියන්නේ කෝඩ් කිහිපයක් තුල රිදම් කිරීම නෙවෙයි.) එම දුෂ්කර පුහුණුවට ගැහැණු ළමුන් යොමුවනවා අඩුයි. අනෙක අවංකව උගන්නන ගුරුවරු ඉතාමත් සුළු පිරිසයි ඉන්නේ.

අපේ ගැහැණු ළමුනට ඩ්‍රම්ස් වාදනය බොහොම ආගන්තුකයි. ඩ්‍රම් නොටේෂන් කියවමින් කරනු ලබන විද්යානුකූල අධයාපනය ලබා ගත හැකි ගුරුවරු ඉන්නෙත් අතේ ඇගිලි ගණනටත් අඩුවෙන්.
මේ නිසා සංගීත කණ්ඩායමක් සාදා ගන්න අවම වශයෙන් අවශ්ය වන වාදිකාවන් පස් දෙනෙකු එකතුකර ගැනීම හරිම අභියෝගයක්.

මධ්‍යම පාන්තික පවුල් වල ගැහැණු දරුවන් බොහෝවිට ඉගනගන්නේ පෙරදිග සංගීතය. මේ තුල වයලීනය සහ සිතාරය තමයි බොහෝ දුරට හදාරනුයේ. ගිටාරය කරේ එල්ලගන පන්ති යන ගැහැණු ළමුන් දකින්නම නැහැ. ඉතින් කොහොමද කාන්තා සංගීත කණ්ඩායම් හදන්නේ.

තිස්ස දොඩන්ගොඩ Monday, September 01, 2014 7:04:00 PM

මේ විස්තර කිරීමට සාධාරණයි කියල මට හිතෙනව
බලමු ඉන්දික මොනව හිතනවද කියල

************************
සංවාදය ඉදිරියට ගෙනයන්න හැමෝටම ආරාධනා ....................